part time job

Legit job $5.23 made by Fast to Earn paid customer Akshay. One project really . Notice screenshot. It review not scam.

http://www.fast2earn.com/

الإعتقاد الإيجابي وحسن الظن بالله تعالى طريقك إلى النجاح

بسم الله الرحمن الرحيم

الحمدلله رب العالمين ، والصلاة والسلام على أشرف الخلق أجمعين ، سيدنا محمد النبي الأمي الأمين ، وعلى آله وصحبه ومن سار على نهجه واتبع سنته إلى يوم الدين ..
أما بعد :

كلامنا انهاردة بإذن الله عن الاعتقاد ،،

الأول كده : هو يعني ايه اعتقاد ؟

بعيدا عن التعريفات المعقدة ومن غير لف ولا دوران..
الاعتقاد هو الإيمان .. حتى فيه ف الشريعة علم اسمه علم العقيدة  ( يعني علم الإيمان ). بيتكلم عن الإيمان بالله عز وجل والإيمان برسله عليهم السلام والإيمان بالقضاء والقدر والجنة والنار وكدا يعني ..
إذاً الاعتقاد هو انك تؤمن بحاجة معينة .. تؤمن بدين ، أو بفكرة أو بهدف ، أو بتصرف بتعمله أو أو أو ....

بما اننا بقى بناخد خطوات في طريق النجاح ؛ كان لازم أكلمك عن الإعتقاد دا لإن الإعتقاد دا بجد قوة سحرية جدا لو استخدمتها بإيجابية هتحقق كل أحلامك بإذن الله .

 اممممممممممم حاول تسترجع ذاكرتك معايا كدا وفكر ومخمخ أووووي .. عمرك حصلك موقف ف مرة كنت داخل على حاجة معينة المفروض تعملها واعتقدت انك مش هتحققها وقلت أنا مش هقدر أعمل كذا وفعلا مش حققت الحاجة دي وقلت للي حواليك (( مش قولتلكم أنا مش هقدر ؟؟؟؟ )) لو حصل معاك كدا فعلا اوعى تلوم الظروف أو تلوم قدراتك أو أو أو .. الغلط فيك انت يا معلم

فيه مقولة بتقول ( دائما ما تعتقده هو ما تستطيع تحقيقه ) .

هحكيلك قصة الدكتور إبراهيم الفقي الله يرحمه كان حكاها في كتاب من كتبه : بيقولك يا سيدي ان ف مدرسة  من المدارس كان فيه طالب نايم في حصة الرياضة ومش مركز خالص ف الشرح ولا ف أي حاجة .  دماغه ف السحااااب :D المهم الواد فاق على جرس المرواح ..فلقى مسألتين مكتوبين على السبورة فنقلهم ف كراسة الواجب ورجع البيت يحلهم لقاهم صعبين جداااااا بس عشان خايف من المدرس لان دا واجب الحصة ؛ فضل يحاول فيهم طول الأسبوع وفعلا نجح في حل واحدة منهم وراح للمدرس يديله الكراسة ويقوله معلش أنا مقدرتش أحل غير واحدة بس والتانية معرفتش ألاقيلها حل خاااالص فالمدرس وقف مذهوووول .. قاله يابني أنا كنت كاتب المسألتين دول على السبورة وقايل ان دول ملهمش حل خالص انت ازاي حليت دي أصلا ؟؟؟؟؟؟؟؟
امممم ازاي الواد دا حل المسألة ؟ طيب لو كان الواد يعرف ان المسائل دي مش لها حل ! كان حاول يحلها أصلا !!!

الإجابة هي قوة الاعتقاد .. الواد اعتقد ان دا واجب مدرسي ولازم يحله ولو مش حله ممكن يتعاقب أو أو أو .. ومعتقد جدا ان المسألة لها حل ولازم يوصله .. وبالتالي وصل لحل المسألة .. اممممممم شوفت قد ايه ان قوة الاعتقاد دي ممكن تصنع المستحيل !!

بص يابن الحلال اعرف انك لو مؤمن انك تقدر تحقق حلم معين هتقدر بإذن الله .. أما لو معتقد انك مش هتقدر تحقق الحلم دا اتأكد انك فعلا مش هتقدر تتقدم أي خطوة لقدام حتى لو الدنيا كلها وقفت جنبك .

طيب هي ايه الحاجات اللي بتأثر في اعتقادات الشخص ؟

 ياااااه حاجات كتيييييييييييييييير منها مثلا 

1.  البيئة: زي الأب والأم والمدرس والأصدقاء الخ ...... فمثلا الأب والأم هما من أهم الحاجات اللي بتأثر ف اعتقادات أبناؤهم .. عشان كدا بنصح كل أب وكل أم دايما يشجعوا ولادهم بكلام إيجابي زي مثلا (( انت عبقري )) (( انت ممتاز )) .. (( انت هتقدر تحقق كذا .. )) كل الكلام دا الطفل بياخده ويحتفظ بيه جوا عقله الباطن ويتبرمج عليه ويتكيف معاه تحديدا لو كان من أشخاص هو بيثق فيهم أوي . كمان  كلام المدرس في الفصل أو الدرس دا بيأثر جدا ف اعتقادات الطالب اللي عنده ..عشان كدا سيدنا النبي صلى الله عليه وسلم بيقول ( يسروا ولا تعسروا وبشروا ولا تنفروا ) بالإضافة طبعا للأصدقاء وتأثيرهم الكبير جدا
2.  كمان من الحاجات اللي بتأثر ف اعتقادات الشخص قراءة سير العظماء : أكيد لما تقرأ سير عظماء وتعرف ازاي هم وصلوا وحققوا انجازاتهم وحققوا أهدافهم دا بيديك دافع قوي انك تعمل زيهم .. فدا تأثير إيجابي جدااا ..
3.  كمان التجارب اللي فاتت اللي مرت بحياتك بتأثر ف اعتقاداتك فلو مثلا مريت بتجربة ونجحت فيها ، لو مريت بنفس التجربة تاني أو بتجربة مشابهة هتقول لنفسك : أنا قدرت قبل كدا يبقى ان شاء الله هقدر تاني ..

كل الحاجات دي وحاجات تانية كتير بتأثر ف اعتقاداتك عشان كدا حاول دايما تقرأ كلام إيجابي وتسمع كلام إيجابي وتفكر بإيجابية تامة ..

طب ازاي أفكر بإيجابية طااااه ؟
هقولك ياعم  بس متزوقش :/
بص يا سيد الناس يا رمانة الميزان التفكير الإيجابي مش هيجي إلا بحسن الظن بالله عز وجل
طب يعني ايه بردو حسن الظن بالله ؟
.. يعني توقع كل حاجة جميلة من الله سبحانه وتعالى .. دايما تفاءل .. لما تفكر بهدف قول لنفسك بإذن الله هحقق الهدف دا ..

يا أخي دا ربنا بيقول" أنا عند ظن عبدي بي .. " متفق عليه أبو هريرة
وفي رواية ( فليظن بي ما شاء ) .

حبيبنا النبي صلى الله عليه وسلم أمرنا بحسن الظن بالله تعالى ف كل وقت وف كل مكان و تحت أي ظرف حتى عند الموت .. عن جابر رضي الله عنه  قال: سمعت رسول الله صلى الله عليه وسلم قبل موته بثلاثة أيام يقول: " لا يموتَنَّ أحدكم إلا وهو يحسن الظن بالله عز وجل "

وفيه قصص كتير بتدل على ان ناس ربنا غفرلهم ذنوبهم وأدخلهم الجنة بسبب حسن ظنهم بالله
فيه واحد اسمه سهل القطعي الله يرحمه بيقول: رأيت مالك بن دينار رحمه الله في منامي، فقلت: يا أبا يحيى ليت شعري، ماذا قدمت به على الله عز وجل؟ قال: قدمت بذنوب كثيرة، فمحاها عني حسن الظن بالله .

كمان وانت بتدعي ربنا لازم يكون عندك حسن ظن بالله انه هيستجيب دعاءك ومن أقوال حبيبي و حبيبك المصطفى صلى الله عليه وسلم " ادعوا الله وأنتم موقنون بالإجابة "

طب بعد الكلام دا كله عاوز الزتونة بتاعة الموضوع دا ..!!

بص من الأخر كدا عشان تحقق هدفك لازم يكون عندك اعتقاد إيجابي انك هتقدر تحققه بإذن الله  >>  والاعتقاد الإيجابي دا مش هيتحقق إلا بحسن الظن بالله عز وجل والتفاااااؤل 

  ( تفاااااءلوااا بالخير تجدوووه ). 

وأخيرا عاوز أقولك إن مهما حصلك ف حياتك أحسن الظن بالله واعرف ان دا خييييير ليك واستحضر دايما قول نبينا صلى الله عليه وسلم: عجبا لأمر المؤمن! إن أمره كله خير ـ وليس ذاك لأحد إلا للمؤمن ـ إن أصابته سراء شكر فكان خيرا له، وإن أصابته ضراء صبر فكان خيرا له. رواه مسلم.

بالتوفيق..

للتواصل عبر Facebook 

حدد هدفك .. قيمة الحياة في أهدافها

بسم الله الرحمن الرحيم

الحمدلله رب العالمين ، والصلاة والسلام على أشرف الخلق أجمعين ؛ سيدنا محمد وعلى آله وصحبه أجمعين
أما بعد :
اتكلمنا في المقال اللي فات عن الطريق للقمة والامتياز وعرفنا انه يتلخص في حاجتين :

1. طاعة الله عز وجل والتوكل عليه : "ومن يتق الله يجعل له مخرجا ويرزقه من حيث لا يحتسب ومن يتوكل على الله فهو حسبه إن الله بالغ أمره قد جعل الله لكل شيئ قدرا "
2. العمل والكفاح والاجتهاد : " وقل اعملوا فسيرى الله عملكم ورسوله والمؤمنون وستردون إلى عالم الغيب والشهادة فينبئكم بما كنتم تعملون " 

وعرفنا إن العمل دا ما هو إلا (  تحديد هدفك .. التخطيط الكويس عشان تحققه .. الكفاح عشان تحققه .. الفشل هو أول خطوة من خطوات النجاح .. الصبر على الابتلاء .. الثقة انك هتقدر ) .

دلوقت بمشيئة الله سبحانه وتعالى هنتكلم عن " تحديد الهدف "
عاوزك تعرف إن أول خطوة من خطوات نجاحك في الحياة هي تحديدك لهدفك

يقول الله عز وجل " أفحسبتم أنما خلقناكم عبثا " ربنا سبحانه وتعالى خلقك وحسن صورتك وزينك وأعطاك عقل تفكر وتخطط وتحلل بيه .. انت شايف ان كل دا عبث !!!!          أكيد لا 

* الله سبحانه وتعالى خلقك في أحسن تقويم لهدف عظيم وغاية سامية
فلو ضيعت الهدف والغاية ومش برمجت حياتك عليها فانت كدا ضيعت الهدف من وجودك وخلقك أصلا

* ولو تأملت حياة كل الناجحين في الحياة هتلاقيهم كلهم كان ليهم هدف من البداية عاوزين يحققوه .. مفيش شخص عايش حياته كدا هباءا وهينجح .. لا طبعا كل الناجحين كل حاجة في حياتهم بمقدار
** قال الحسن البصري عن عمر بن عبد العزيز – رحمهم الله - : ( ما ظننت عمر خطا خطوة إلا وله فيها نية). والنية هنا بمعنى الهدف

 ** قال أحدهم " اعلم أن الحياة بدون هدف هي مجرد عبث وصاحبها ميت يمشي على قدميه "
 ** وفيه جملة عجبتني أوي بتقول " إذا كانت لك غاية، فلن تعدم الوسيلة المناسبة لتحقيق تلك الغاية "  
** ونابليون بونابرت بيقول : " إن الرجل الذي عقد النية على الفوز، لا ينطق بكلمة مستحيل ". والنية هنا بردو بمعنى الهدف 


تمام دلوقت خلاص أنا قررت يكون ليا هدف .. طب هو فيه نصايح أتبعها وأنا بحدد هدفي دا عشان في النهاية أقدر أحققه ؟

أكيد فيه نصايح كتير أوووووووي .. بص يا سيدي اختصارا كدا : 

1. اتأكد من اقتناعك بالهدف اللي اخترته قبل ما تسعى لتحقيقه، لان الاقتناع بالهدف أهم بكتير من تحقيقه، فلو كنت مش مقتنع به فتأكد من انك مش هتقدر تحققه أبدا مهما قدمت من تنازلات و تضحيات و مجهودات
   أنا مقتنع جدا بالمقولة اللي بتقول " حب ما تفعل حتى تفعل ما تحب "
2. كن واقعي في تحديد أهدافك ومش تبالغ أوي في الواقعية .. مش فاهم صح ! أقصد راعي في تحديد أهدافك الإمكانات المتاحة والمتوقعة وبعدين حدد الأهداف على مقدارها يعني الأهداف متكونش خيالية في طموحها وفي نفس الوقت الإمكانات المعدة لها أو اللي يُمكن إعدادها متواضعة جداً ... وفي المقابل احذر من انك تنشغل بأهداف متواضعة جداً مع إنك تقدر تقوم بأهداف غيرها،  الأمرين مضيعة للوقت وإهدار للطاقات.
3. قسم أهدافك في الحياة إلى : ** أهداف كبيرة كلية .. ** وأهداف صغيرة لو حققتها هتوصلك للأهداف الكبيرة دي ..
4. احلم و شجع نفسك على تحقيق هدفك، و حاول انك تكون  مش عصبي ولا متسرع.
5. اوعى الظروف أو العوائق تعيق وصولك لتحقيق أهدافك، و تذكر دايما أن الخطأ هو الطريق للتقدم، ومنه بنتعلم الصواب .. فيه حكمة صينية عجبتني أوي كنت قرأتها في أحد الكتب بتقول (( الضربة التي لا تقتلني تقويني )) بص أكيد هيقابلك عقبات كتيييير أوووووي بس خلي كل عقبة تزيدك قوة .
6. الهدف اللي عاوز توصله لازم يكون هدف مشروع >> الأهداف الممكنة كتيييييييرة والحياة مش بتضيق إلا على العاجزين.. ونبينا يونس عليه السلام حتى وهو في بطن الحوت كان من المسبحين." فلولا أنه كان من المسبحين للبث في بطنه إلى يوم يبعثون ".
7. ابدا بكتابه خطتك ، من شروط تحقق الأهداف انك تحط خطة للوصول للأهداف دي  (( التخطيط .. دا بإذن الله يكون له مقال لواحده )) 
8. نفذ الخطة : واعرف ان الخطه ممكن تحتاج لبعض التعديلات على حسب الظروف
9. من عوامل النجاح في تحقيق الأهداف انك تكتم أمرها وأمر السعي والعمل انك تحققها، وكما ورد في الأثر " استعينوا على قضاء حوائجكم بالكتمان " إلا إذا كان اللي هتعرفه دا حد قريب منك أوي وواثق إنه هيشجعك أوووي وياخد بإيدك لتحقيق الهدف دا 

بالتوفيق .

الطريق إلى القمة والإمتياز

بسم الله الرحمن الرحيم 

الحمدلله رب العالمين ؛ والصلاة والسلام على أشرف المرسلين ؛ سيدنا محمد وعلى آله وصحبه أجمعين

أما بعد :

يا ترى ليه فيه ناس ناجحة وناس مش ناجحة ؟؟؟ ليه فيه ناس بتحقق أحلامها وناس مش بتحقق أي حاجة من اللي بتحلم بيه ؟؟

مع ان كل البشر زي بعض ؟ كلنا زي ما قال دكتور ابراهيم الفقي رحمه الله  نمتلك 4 حاجات : خامات .. وقت .. فكر .. طاقة

1. الخامات : يعني الحواس الخمس
2. الوقت : 24 ساعة في اليوم .. يعني 1440 دقيقة 
3. الفكر : ربنا سبحانه وتعالى ميزنا بالعقل والقدرة على التفكير والتخطيط والتحليل 
4. الطاقة : اللي بتخرج بسبب التفكير والتخطيط والتحليل دا 

طيب طالما كلنا بنمتلك الأربع حاجات دي ! ليه فيه ناس متميزة عن ناس !!

أقولك أنا يا سيدي .. حل اللغز دا سهل أووووووي .. الشخص المتميز هو اللي بيقدر يستغل الأربع حاجات اللي فوق دول صح (( خاماته .. ووقته .. وتفكيره .. وطاقته )) طيب وهو الشخص اللي مش متميز دا عاوز يكون مش متميز ؟؟؟ لا طبعا مفيش حد مننا مش عاوز يكون متميز بس الفرق في الاستغلال الصح للأربع حاجات اللي فوق دول .. وركز أوي على كلمة ( الصح ) دي . لإن الشخص اللي مش متميز بيستغل خاماته ووقته وتفكيره وطاقته بردو .. بس بيستغلهم غلط

طيب ما كفاية رغي بقى وندخل في المفيد ؟ قشطة ابرنس ركز وطأطأ ودانك معايا :D طأطأتهم ! تمام :D لو سألتك دلوقت سؤال صغيور أوي .. هو احنا عايشين ليه ؟ عايشين عشان نعبد ربنا سبحانه وتعالى بدليل قوله عز وجل ( وما خلقت الجن والإنس إلا ليعبدون ) تمام يبقى لازم نكون متفقين ان عبادة ربنا تبقى أول أولوياتنا عشان ربنا يكرمنا ( وما توفيقي إلا بالله )

طيب سؤال كمان .. هو انت متميز ؟؟؟؟ أيوة انت متميز ( كلنا متميزوووووون ) لإن ربنا سبحانه وتعالى خلقنا كلنا متميزين بدليل قوله تعالى ( لقد خلقنا الإنسان في أحسن تقويم ) عشان كدا ربنا سبحانه وتعالى سخر لنا السماوات والأرض وما بينهما عشان تساعدنا .. لإن كل واحد فينا له رسالة في الحياة ولازم يأديها .. (( ألم تروا أن الله سخر لكم ما في السماوات وما في الأرض وأسبغ عليكم نعمه ظاهرة وباطنة )) الحمدلله رب العالمين ..

طيب ليه مش بنستغل الحاجات دي كلها ونبقى متميزون بجد ؟ إن شاء الله هنتسغلها ^_^  بس اعرف انك هتتعب أوي لإن الطريق للقمة ليس مفروشا بالورود عشان كدا محتاجين صبر وكفاح وانضباط وتحدي .... مدرس القرآن بتاعي كان دايما يقولي مقولة للشاعر أبي القاسم الشابي بيقول فيها 

إذَا مَا  طَمَحْـتُ  إلِـى  غَـايَةٍ       رَكِبْتُ   الْمُنَى  وَنَسِيتُ   الحَذَر

وَلَمْ  أَتَجَنَّبْ  وُعُـورَ  الشِّعَـابِ       وَلا كُبَّـةَ  اللَّهَـبِ   المُسْتَعِـر

وَمَنْ  لا  يُحِبّ  صُعُودَ  الجِبَـالِ     يَعِشْ  أَبَدَ  الدَّهْرِ  بَيْنَ   الحُفَـر

الطريق إلى القمة والإمتياز يتلخص في : 

1. طاعة الله عز وجل : طبعا ما أجمل أن تكون على ارتباط بالله عز وجل ف كل شئ في حياتك .. لإن زي ما اتفقنا احنا اتخلقنا أصلا عشان نعبد ربنا سبحانه وتعالى .. يبقى كل حاجة في حياتنا لازم نعملها واحنا بنقصد بيها وجه الله عز وجل .. عشان ربنا يكرمنا ويساعدنا (( ومن يتق الله يجعل له مخرجا ويرزقه من حيث لا يحتسب ومن يتوكل على الله فهو حسبه إن الله بالغ أمره قد جعل الله لكل شيء قدرا )) والله هذه الأيات تكفي ..
2. طيب هل يكفي طاعة الله عز وجل للوصول إلى الإمتياز ؟ طبعا تكفي ولكن فين العمل ؟؟؟؟ فين الجهاد ؟؟ فين الكفاح ؟؟؟ لازم يكون ارتباطك بالله عز وجل ممزوج بالعمل يقول الله عز وجل (( وقل اعملوا فسيرى الله عملكم ورسوله والمؤمنون وستردون إلى عالم الغيب والشهادة فينبئكم بما كنتم تعملون )) ..
   العمل دا عبارة عن (( تحديد هدفك .. التخطيط الكويس عشان تحققه .. الكفاح عشان تحققه .. الانضباط .. الفشل هو أول خطوة من خطوات النجاح .. الصبر على الابتلاء .. الثقة انك هتقدر )) التفاصيل في مقالات قادمة إن شاء الله  

بالتوفيق